وزیراعظم کا پاکستانی معیشت بارے بلومبرگ کی رپورٹ کا خیر مقدم

اسلام آ باد( نیوز رپورٹر)وزیراعظم شہباز شریف نے پاکستانی معیشت کے حوالے سے بلومبرگ کی حالیہ مثبت رپورٹ کا خیر مقدم کرتے ہوئے کہا ہے کہ یہ رپورٹ پاکستانی معیشت پر عالمی سرمایہ کاروں کے اعتماد میں مسلسل اضافے کی مظہر ہے،ترقی کا یہ سفر اب جاری رہے گا۔ پیرکو وزیراعظم آفس کے میڈیا ونگ کی طرف سے جاری بیان کے مطابق وزیراعظم نے کہا کہ رپورٹ میں بتایاگیا کہ پاکستان کے کریڈٹ ڈیفالٹ سواپ (Credit Default Swap - CDS) میں مضمر ڈیفالٹ کے امکانات میں 2200 بیسس پوائنٹس کی خاطر خواہ کمی واقع ہوئی ہے، پاکستان کے سی ڈی ایس کی قیمت میں نمایاں کمی پاکستانی معیشت پر عالمی سرمایہ کاروں کے اعتماد میں مستقل اضافے کی مظہر ہے۔وزیراعظم نے کہا کہ عالمی درجہ بندی کے مطابق ابھرتی ہوئی معیشتوں میں اس وقت ترکیہ کے بعد پاکستان دوسرے نمبر پر ہے جو ہماری معیشت کیلئے اچھی خبر ہے۔