27 ویں ترمیم پر اتفاق رائے کیلئے وزیراعظم متحرک، اتحادیوں سے مشاورت

اسلام آباد( رانا غلام قادر ) وزیراعظم شہباز شریف مجوزہ 27ویں آئینی ترمیم پر اتفاق رائے کیلئے متحرک ہوگئے، اتحادیوں سے مشاورت کی ۔ وزیر اعظم نے جمعرات کے روز مسلم لیگ ن کی اتحادی جماعتوں کی قیادت سے ملاقاتیں کیں اور انہیں آئینی ترمیم کے ڈرافٹ پر اعتماد میں لیا۔وزیر اعظم آفس سے جاری اعلامیہ کے مطا بق وزیر اعظم سے کنوینر ڈاکٹر خالد مقبول صدیقی کی قیادت میں متحدہ قومی موومنٹ کے سات رکنی وفد نے ملاقات کی ملاقات میں مجوزہ 27ویں آئینی ترمیم پر مشاورت کی گئی،دریں اثنا ء وزیراعظم شہباز شریف سے وفاقی وزیر برائے سمندر پار مقیم پاکستانی، چوہدری سالک حسین کی قیادت میں مسلم لیگ ق کے چار رکنی وفد نے ملاقات کی،ملاقات میں مجوزہ 27ویں آئینی ترمیم پر مشاورت کی گئی ۔ادھروزیراعظم شہباز شریف سے استحکام پاکستان پارٹی کے صدر اور وفاقی وزیر مواصلات عبد العلیم خان اور وزیر مملکت برائے سمندر پار مقیم پاکستانی، عون چوہدری نے ملاقات کی اس دوران مجوزہ 27ویں آئینی ترمیم پر مشاورت کی گئی ۔ وزیراعظم سے بلوچستان عوامی پارٹی کے صدر اور وفاقی وزیر سائنس اینڈ ٹیکنالوجی خالد حسین مگسی اور سینیٹر منظور احمد کاکڑ، پاکستان مسلم لیگ ضیاء کے رکن قومی اسمبلی اعجاز الحق، نیشنل پارٹی کے رکن قومی اسمبلی میر پو لین بلوچ اور عوامی نیشنل پارٹی کے صدر سینیٹر ایمل ولی خان اور سینیٹر عمر فاروق نےالگ الگ ملاقاتیں کیں۔ ملاقاتوں میں مجوزہ 27ویں آئینی ترمیم پر مشاورت کی گئی ، وزیر اعظم نے ڈرافٹ پر اعتماد میں لیا ۔