سینیٹ کمیٹی، منصوبوں کے مختص فنڈز اجراء اور استعمال میں تاخیر پر تشویش کا اظہار

اسلام آباد ( کامرس رپورٹر ) سینیٹ کی قائمہ کمیٹی منصوبہ بندی نے پی ایس ڈی پی کے تحت منصوبوں کے مختص فنڈز کے اجراء اور استعمال میں تاخیر پر تشویش کا اظہار کیا ہےاور کہا کہ بڑے منصوبوں کی بروقت تکمیل نہ ہونے کی بڑی وجہ فنڈز کابروقت اجراء نہ ہونا ہے، کمیٹی کو بتایاگیا کہ رواں مالی سال کی دوسری سہ ماہی کےلیے 330ارب روپے کے فنڈز جاری کرنے کی منظوری دی گئی ہے، کمیٹی نے ہدایت کی کہ فنڈز کے جلد اجراء اور استعمال کا معاملہ متعلقہ وزارتوں اور ڈویژن کے ساتھ اٹھانے کی ہدایت کر دی ،کمیٹی کا اجلاس سینٹر قراۃ العین مری کی زیر صدارت ہوا، کمیٹی کوسکھر حیدر آباد، کراچی موٹروے 6سے متعلق این ایچ اے ، وزارت اقتصادی امور ، اور پبلک پرائیویٹ پارٹنرشپ اتھارٹی کے حکام نے بریفنگ دی ، کمیٹی کو بتایا گیا کہ موٹر وے6کے پی سی ون کی منظوری دی جاچکی ہے، اور اسلامی ترقیاتی بنک ، سعودی ڈویلپمنٹ فنڈ سمیت بین الاقوامی شراکت داروں سے قرضے کی فراہمی کے لیے بات چیت ہورہی ہے۔