خالق آباد، دالبندین تربت اور کچھی میں فائرنگ، قبائلی رہنما سمیت 7 افراد جاں بحق

کوئٹہ (اسٹاف رپورٹر) خالق آباد ٗ دالبندین ٗ تربت اور کچھی میں فائرنگ کے واقعات میں قبائلی رہنما اور اس کے بھائی سمیت سات افراد جاں بحق اور ایک زخمی ہو گیا ۔ پولیس کے مطابق خالق آباد کے علاقے زرد غلام جان کے رہائشی قبائلی رہنما شاکر سعداللہ لانگو اسکا بھائی شاکر خیراللہ لانگو ولد مولا بخش اپنے دو ساتھیوں محمد کریم ولد محمد ٗ محمد ظاہر ولد خالقداد کے ہمرا ہ سر بندہ زرد غلام جان کے پہاڑی علاقے کے قریب موجود تھے کہ نامعلوم مسلح افراد نے انہیں گھیرے میں لے کر شدید فائرنگ کی اور فرار ہو گئے۔ فائرنگ سے چاروں افراد موقع پر ہی جاں بحق ہو گئے ۔اطلاع ملنے پر پولیس اور سیکورٹی فورسز نے علاقے کو گھیرے میں لے کر لاشوں کو ہسپتال پہنچایا جہاں ضروری کارروا ئی کے بعد لاشیں ورثا کے حوالے کر دی گئیں ۔سیکورٹی فورسز نے ملزمان کی گرفتاری کیلئے پہاڑی علاقے میں سرچ آپریشن شروع کر دیا ۔ کچھی پولیس کے مطابق حاجی شہر کے علاقے گوٹھ مصری خان کا رہائشی عبدالقادر گزشتہ روز گھر سے بازار جا رہا تھا کہ نامعلوم افراد اس پر فائرنگ کرتے ہوئے فرار ہو گئے فائرنگ کے نتیجے میں وہ موقع پر ہی جاں بحق ہو گیا۔دالبندین پولیس کے مطابق زمیندار سردار محمد حسین گزشتہ روز اپنی زمینوں پر جا رہا تھا کہ نامعلوم موٹرسائیکل سوار وں نے اسے گولی مار دی ۔پولیس نے لاش تحویل میں لے کر ہسپتال منتقل کی ۔ تربت پولیس کے مطابق اسے تربت کے علاقے ہوشاب میں ایک لاش کی اطلاع ملی جسے ہسپتال پہنچایا گیا ۔