بلوچستان کی روایتی محافظ فورس کو وسائل کی لوٹ مار کیلئے ختم کیا گیا، لشکری رئیسانی

کوئٹہ(اسٹاف رپورٹر)سینئر سیاست دان سابق سینیٹر نوابزادہ حاجی میر لشکری خان رئیسانی نے کہا ہے کہ وسائل کی لوٹ مار کیلئے بلوچستان کی روایتی محافظ فورس کو نوآبادیاتی پالیسی کے تحت ختم کیا گیا ہے ، لیویز فورس کے خاتمہ میں سیاسی جماعتیں بری الزمہ نہیں بلکہ اس سرزمین کے لوگوں اور تاریخ کو جوابدہ ہیں ، یہ بات انہوں نے رسالدار میجر ظریف خان کاکڑ کی قیادت میں شیرانی و حریفال قبائل کے نمائندہ وفد سے سراوان ہاؤس میں ملاقات کے موقع پر گفتگو کرتے ہوئے کہی ۔ نوابزادہ حاجی میر لشکری خان رئیسانی نے کہا کہ لیویز فورس بلوچستان کے قبائل اور مقامی آبادیوں پر مشتمل ہے جو اپنے وطن کی روایتی محافظ ہے جس کی بنیادی ذمہ داری مقامی سطح پر امن و امان برقرار رکھنا ہے ، تاہم بلوچستان کی مقامی فورس کو نوآبادیاتی پالیسی کے تحت ختم کیا گیا ہے ۔