پاکستان اوربرطانیہ کا تعلیمی شعبے میں تعاون کےفروغ پراتفاق

اسلام آباد (نامہ نگار خصوصی)  پاکستان اوربرطانیہ کا تعلیمی شعبے میں تعاون کےفروغ  پراتفاق ۔قائداعظم یونیورسٹی اسلام آباد اور یونیورسٹی آف کیمبرج برطانیہ نے میٹریلز سائنس اور ابھرتی ہوئی ٹیکنالوجیز میں تعاون کو فروغ دینے کیلئے مفاہمت کی یادداشت پر دستخط  کر دیے ۔ شراکت داری کا مقصد پاکستان کی تحقیقی صلاحیت کو مضبوط بنانا، علمی مہارت کو فروغ دینا اور سائنسی شعبوں میں بین الاقوامی تعاون کو بڑھانا ہے۔ اس معاہدے پر دستخط لندن میں ایک تقریب میں کیمبرج انٹرپرائز لمیٹڈ برطانیہ اور پاکستان انسٹی ٹیوٹ فار ڈویلپمنٹ اکنامکس اسلام آباد کے درمیان ایک اور مفاہمتی یادداشت پر دستخط کی تقریب کے دوران کئے گئے ۔ اس موقع پر وزیر منصوبہ بندی احسن اقبال بھی موجود تھے۔ وزیر منصوبہ بندی نے شراکت داری کو پاکستان کی علمی معیشت کی تعمیر کی جانب ایک تاریخی قدم قرار دیا۔ انہوں نے کہا کہ اس تعاون سے پاکستان کی یونیورسٹیوں کو بین الاقوامی جامعات کے ساتھ تعاون کو فروغ دینے اورتعلیمی وظائف اورٹیکنالوجی شراکت داروں سے منسلک کرنے میں مدد ملے گی۔