27 ویں آئینی ترمیم جمہوریت اور عدلیہ کیخلاف سازش، پی ٹی آئی نے مسترد کر دیا

اسلام آباد (خبر نگار) پاکستان تحریک انصاف کی پارلیمانی پارٹی نے 27 ویں آئینی ترمیم کو جمہوریت اور عدلیہ کے خلاف سازش قرار دیتے ہوئے اسے متفقہ طور پر مسترد کر دیا۔ ارکان نے فیصلہ کیا کہ تحریک انصاف اس غیر آئینی اقدام کے خلاف قومی سطح پر پرامن احتجاج کرے گی۔ گزشتہ روز پاکستان تحریک انصاف کی پارلیمانی پارٹی کا اجلاس اپوزیشن لیڈر محمود خان اچکزئی کی زیر صدارت قومی اسمبلی میں منعقد ہوا، جس میں پارٹی کے ارکان پارلیمان نے شرکت کی۔ اجلاس کے شرکاء نے بانی چیئرمین عمران خان کی غیر قانونی حراست پر گہری تشویش کا اظہار کرتے ہوئے ان کی فوری رہائی کیلئے سیاسی و قانونی اقدامات کا فیصلہ کیا۔ محمود خان اچکزئی نے کہا کہ عمران خان جمہوریت کی بقاء کی علامت ہیں اور کروڑوں عوام ان کے ساتھ کھڑے ہیں،پارلیمانی پارٹی نے خیبر پختونخوا میں منعقدہ امن جرگے کو سراہا اور مطالبہ کیا کہ جرگے میں منظور کی گئی امن و استحکام کی قرار دادوں پر فوری عملدرآمد یقینی بنایا جائے، اجلاس کے بعد میڈیا سے گفتگو کرتے ہوئے سابق اسپیکر قومی اسمبلی اسد قیصر نے کہا کہ 27 ویں ترمیم آئین اور پارلیمانی روایات کی خلاف ورزی ہے۔ انہوں نے جسٹس منصور علی شاہ اور جسٹس اطہر من اللہ کے استعفوں کو آئین کی سربلندی کی مثال قرار دیا، تحریک انصاف نے اپنے اعلامیے میں واضح کیا کہ وہ آئین کی حفاظت، عدلیہ کی آزادی، جمہوریت کی بقاء اور بانی چیئرمین کی رہائی تک اپنی پرامن اور آئینی جدوجہد جاری رکھے گی۔