جوڈیشل کمیشن اجلاس ، سپریم کورٹ جج ، سندھ وبلوچستان کے چیف جسٹس تعیناتی کی سفارش

اسلام آباد (جنگ رپورٹر )جوڈیشل کمیشن آف پاکستان نے جسٹس ظفر احمد راجپوت کو سندھ ہائی کورٹ کا چیف جسٹس اور جسٹس محمد کامران خان ملاخیل کو بلوچستان ہائی کورٹ کا چیف جسٹس جبکہ جسٹس میاں گل حسن اورنگزیب کو سپریم کورٹ کا جج مقررکردیا ، کمیشن نے جوڈیشل کمیشن کے رولز کے مسودہ کی تشکیل کے لئے پانچ رکنی کمیٹی بھی تشکیل دے دی ، وفاقی آئینی عدالت کے جسٹس عامر فاروق کی سربراہی میں کمیٹی اٹارنی جنرل منصور عثمان اعوان، سینیٹر فاروق حمید نائیک، سینیٹر سید علی ظفر اور احسن بھون، ایڈووکیٹ پر مشتمل ہے۔اعلامیہ کے مطابق منگل کے روز جوڈیشل کمیشن کا اجلاس چیف جسٹس یحیٰ آفرید ی کی زیر صدارت سپریم کورٹ کے کانفرنس روم میں منعقد ہوا، جس میں مختلف سطح پر اہم عدالتی تقرریوں کی سفارشات کو حتمی شکل دی گئی ، کمیشن نے متفقہ طور پر سندھ ہائی کورٹ کے قائم مقام چیف جسٹس ،ظفر احمد راجپوت کو سندھ ہائی کورٹ کا چیف جسٹس اور بلوچستان ہائی کورٹ کے قائم مقام چیف جسٹس ، محمد کامران خان ملاخیل کو بلوچستان ہائی کورٹ کا چیف جسٹس مقرر کرنے کی سفارشات منظور کرلیں تاہم کمیشن کے کل اراکین کی اکثریت نے اسلام آباد ہائی کورٹ کے جج اور سپریم کورٹ کے قائم مقام جج جسٹس میاں گل حسن اورنگزیب کو سپریم کورٹ کا جج مقرر کرنے کی سفارش بھی کر دی، علاوہ ازیں، جوڈیشل کمیشن نے اپنی کل رکنیت کی اکثریت سے آئین اسلامی جمہوریہ پاکستان کے آرٹیکل 175 {A} کی شق (20) کے تحت جوڈیشل کمیشن کے رولز کا مسودہ تشکیل دینے کے لیے ایک کمیٹی تشکیل دے دی ، وفاقی آئینی عدالت کے جسٹس عامر فاروق کی سربراہی میں یہ کمیٹی اٹارنی جنرل منصور عثمان اعوان، سینیٹر فاروق حمید نائیک، سینیٹر سید علی ظفر اور احسن بھون، ایڈووکیٹ پر مشتمل ہے۔