پاکستان کے فن ٹیک شعبے میں سرمایہ کاری میں اضافہ، 26.3ملین ڈالر تک پہنچ گئی، فوربز

اسلام آباد(مانیٹرنگ ڈیسک) وزارت آئی ٹی و ٹیلی کمیونیکیشن کے مطابق ،بین الاقوامی میگزین فوربز کی نئی رپورٹ میں بتایا گیا ہےکہ 2024 میں پاکستان کے فن ٹیک شعبے میں سرمایہ کاری دوگنی ہوگئی جو بڑھ کر26.3ملین ڈالر تک پہنچ گئی، اس سے قبل 2023 میں یہ سرمایہ کاری صرف 12.5 ملین ڈالر رہی تھی۔فوربز کا کہنا ہے کہ 2025 کے پہلے 6 ماہ میں سرمایہ کاری مزید بڑھ کر 52.5 ملین ڈالر تک پہنچ چکی ہے، جو فن ٹیک سیکٹر کی تیز رفتار ترقی کی نشاندہی کرتا ہے۔وزارت آئی ٹی کا کہنا ہےکہ حکومت کے ڈیجیٹلائزیشن ایجنڈے نے ملکی اور غیر ملکی سرمایہ کاروں کے اعتماد کو مستحکم کیا ہے جب کہ پاکستان اسٹارٹ اپ فنڈ کے تحت ایکویٹی فری گرانٹس کا اجراء سرمایہ کاروں کی دلچسپی بڑھانے میں اہم کردار ادا کر رہا ہے۔