ٹیکس وصولی میں اضافہ مضبوط معیشت سے ہی ممکن ہے، وزیراعظم

اسلام آباد( رانا غلام قادر نیو ز رپورٹر)وزیر اعظم شہباز شریف نے کہا ہے کہ کاروبار اور مضبوط معیشت ہی سے ٹیکس آمدن میں اضافہ ہوگا، برآمدات میں اضافے پر مبنی ملکی معاشی ترقی کیلئے عملی اقدامات اٹھا رہے ہیں۔ کاروباری شخصیات اور سرمایہ کار قابل احترام ہیں، مختلف ورکنگ گروپس کی تجاویز پر عملدرآمد یقینی بنایا جائیگا۔ وزیراعظم شہباز شریف نے ان خیا لات کا اظہار گزشتہ روز اپنی زیر صدارت ملکی معاشی اصلاحات کیلئے نجی شعبے کے ماہرین پر مبنی ٹیکس شعبے کی اصلاحات پر ورکنگ گروپ کا اجلاس کے دوران کیا۔ وزیر اعظم نے کہا کہ حکومت ٹیکس دینے والے کاروباری حضرات اور کمپنیوں کو قدر کی نگاہ سے دیکھتی ہے۔ وزیر اعظم نے کہا کہ طویل مدتی اقدامات کے ذریعے ملک میں کاروبار کو بہتر اور مسابقتی بنانا چاہتے ہیں۔ انہوں نے کہا کہ نجی شعبے کے ماہرین کی جانب سے جامع تجاویز پیش کی گئیں جن پر مشکور ہوں۔ وزیرِ اعظم نے کہا کہ ان تجاویز پر غور و خوض کے بعد انہیں قابل عمل بنانے کیلئے وزیر خزانہ کی صدارت میں کمیٹی قائم کر رہا ہوں۔کمیٹی عملی اقدامات پر مبنی لائحہ عمل پیش کرے گی۔ اجلاس میں شریک کاروباری شخصیات و سرمایہ کاروں نے گزشتہ اجلاس میں ایکسپورٹ ڈیولپمنٹ سرچارج ختم کرنے کے احکامات پر وزیر اعظم کا شکریہ ادا کیا۔دریں اثنا وزیر اعظم سے جمہوریہ ترکیہ کے توانائی اور قدرتی وسائل کے وزیر الپ ارسلان بیریکترنے ملاقات کی، وزیراعظم نے دوطرفہ تعلقات کی مثبت رفتار پر اطمینان کا اظہار کیا اور ترکیہ کے ساتھ بالخصوص توانائی کے شعبے میں تعاون کو مزید وسعت دینے کیلئے پاکستان کے پختہ عزم کا اعادہ کرتے ہوئے ترک سرمایہ کاروں کو سرمایہ کاری بڑھانے کی دعوت دی،فریقین کے درمیان اس بات پر اتفاق کیا گیا کہ پاکستان کا وزارتی وفد جلد ہی ترکیہ کا دورہ کرے گا تاکہ دونوں ممالک کے درمیان بالخصوص توانائی اور بجلی کے شعبے میں مزید تعاون تلاش کیا جا سکے۔