وزیر اعلیٰ KP سے امریکی قونصل جنرل کی ملاقات ،دہشتگردی، باہمی تعاون پرگفتگو

پشاور(جنگ نیوز)وزیر اعلیٰ خیبر پختونخوا محمد سہیل آفریدی سے امریکی قونصل جنرل مسٹر تھامس ایکرٹ کی وزیر اعلیٰ ہائوس میں ملاقات ہوئی، جس میں باہمی ترقی ،سرمایہ کاری، خوشحالی اور دہشتگردی کے خلاف تعاون پر تبادلہ خیال کیا گیا۔وزیر اعلیٰ نے واضح کیا کہ عوامی مفاد صوبائی حکومت کے تمام فیصلوں کی بنیاد ہے۔ نائن الیون کے بعد کی صورتحال کا حوالہ دیتے ہوئے وزیر اعلی نے کہا کہ خیبر پختونخوا نے دہشت گردی کے خلاف جنگ میں سب سے زیادہ نقصان اٹھایا اور اب صوبائی حکومت بنیادی ڈھانچے کی ترقی، ادارہ جاتی مضبوطی، اور استعداد سازی پر بھرپور توجہ دے رہی ہے۔ انہوں نے یہ بھی بتایا کہ حکومت سستی اور صاف توانائی فراہم کرنے کے لیے چھوٹے پن بجلی گھروں اور ڈیموں پر فعال طور پر کام کر رہی ہے تاکہ گھریلو اور تجارتی صارفین کو سستی بجلی کی فراہمی ممکن ہو سکے۔ امریکی قونصل جنرل نے کہا کہ تجارتی سفارت کاری امریکی خارجہ پالیسی کا بنیادی ستون ہے اور اقتصادی تعلقات عالمی امن و استحکام کو فروغ دینے میں اہم کردار ادا کرتے ہیں۔ملاقات کا اختتام دونوں فریقین کے اس مشترکہ عزم کے ساتھ ہوا کہ وہ سیکورٹی، ترقی، اور باہمی خوشحالی کے لیے دوطرفہ تعاون کو مستحکم کریں گے۔