کراچی‘ ڈکیتی مزاحمت پر شہری قتل، عوام کا ڈاکو پر تشدد ، آگ لگادی

کراچی (اسٹاف رپورٹر)اورنگی ٹاؤن میں ڈکیتی مزاحمت پر شہری قتل، مشتعل عوام نےتشدد کے بعد ڈاکو کو آگ لگادی ،ویڈیو وائرل ہونے کے بعد واقعہ کے تین مقدمات درج،غفلت برتنےپر ایس ایچ او معطل ، اورنگی ٹاؤن تھانے کی حدود سیکٹر سیون ایف بلوچ گوٹھ میں گزشتہ روز ڈکیتی مزاحمت پر عبدالحنان نامی شہری جاں بحق ہوا تھا۔واقعہ کے بعد مشتعل شہریوں نے ڈاکو کو پکڑ کر تشدد کا نشانہ بنایا تھا اور اسے آگ لگا دی تھی جس کی ویڈیو بھی سامنے آئی ہے۔ویڈیو میں دیکھا جاسکتا ہے کہ مشتعل شریوں نے ڈاکوکو بجلی کے کھمبے سے باندھ کر تشدد کا نشانہ بنایا اور ڈاکو پر پیٹرول چھڑک کر آگ لگا دی ۔پولیس نے ڈاکوؤں کی فائرنگ سے شہری عبدالحنان کے جاں بحق ہونے اور شہریوں کے تشدد سے ڈاکو کی ہلاکت کے تین مقدمات درج کر لیے ہیں۔پہلا مقدمہ شہری عبدالحنان کے قتل کامقدمہ اس کے سسرگل محمد خان کی مدعیت میں درج کیا گیا ہے۔ مقدمہ میں قتل اور ڈکیتی سمیت دیگر دفعات شامل کی گئی ہیں۔ پولیس کے مطابق دوسرا مقدمہ ہلاک ڈاکوکے قبضے سے غیر قانونی اسلحہ برآمد ہونے کا درج کیا گیا۔واقعہ کا تیسرا مقدمہ پولیس کی مدعیت میں 30 سے 35 افراد کے خلاف درج کیا گیا ہے۔مقدمہ پولیس اہلکار کی مدعیت میں درج کیا گیا۔ ہلاک ہونیوالے ڈاکو کی شناخت ساجد ولد زرین داد کے نام سے ہوئی ۔مقدمہ زیر دفعہ 302/147/149 کے تحت تیس سے پینتیس نامعلوم افراد کے خلاف درج کیا گیا ہے۔دوسری جانب غفلت برتنے پر ایس ایچ او اورنگی ٹاؤن یوسف مہر کو معطل کر کے ہیڈ کوارٹر ویسٹ رپورٹ کرنے کے احکامات جاری کیے گئے ہیں۔